Presidenti i Shteteve të Bashkuara të Amerikës, Joe Biden ka kritikuar kryeministrin e Izraelit, Benjamin Netanyahu sa i takon vrasjeve ndaj popullsisë civile në Gaza.
Biden tha se përgjigjia ushtarake e Izraelit ndaj sulmeve të Hamasit ka qenë e ekzagjeruar.
"Unë jam i mendimit, siç e dini, përgjigjia e Izraelit në Rripin e Gazës, ka qenë e ekzagjeruar," u tha Biden gazetarëve në Shtëpinë e Bardhë.
Në kuadër të këtij qëndrimi, administrata e Biden lëshoi një memorandum të sigurisë kombëtare që kërkon nga qeveritë e huaja të garantojnë se nuk do të shkelin të drejtat e njeriut me armët e blera nga SHBA-të.
Ndërkohë, në Jemen SHBA-të kanë lëshuar 7 raketa të tjera ndaj rebelëve ‘Houthi’. Grupi i Hezbollahut nga ana tjetër lëshoi 30 raketa nga Libani drejt Izraelit.
Forcat e ushtrisë izraelite vazhdojnë me bastisjet në zonën e Rafah ku së fundmi janë shënuar 8 viktima, mes tyre 3 fëmijë. SHBA-të paralajmëruan se një zhvendosje e popullsisë së kësaj zone do të ishte një fatkeqësi.
Ori Gordin
“Ne jemi të vendosur të ndryshojmë realitetin e sigurisë dhe kjo tashmë po ndodh në këto ditë dhe ne vazhdojmë të përgatitemi për zgjerimin e luftës dhe ofensivës”,- tha komandanti i Komandës Veriore të IDF-së, gjeneralmajor, Ori Gordin.
Komandati izraelit bëri këtë deklaratë gjatë takimit me kryetarët e qyteteve kufitare libaneze të evakuuara, duke specifikuar se "objektivi ynë është të ndryshojmë situatën e sigurisë në veri në mënyrë që të lejojmë banorët të kthehen të sigurt".
Philippe Lazzarini
"Të hënën e ardhshme, Komisioneri i Përgjithshëm i UNRWA, Philippe Lazzarini do të marrë pjesë në takimin e Këshillit tw Punëve të Jashtme dhe do të jetë e rëndësishme të mësohet drejtpërdrejt prej tij për kushtet në terren në Gaza".
Këtë tha një zëdhënëse e Komisionit Evropian, duke kujtuar në të njëjtën kohë se BE-ja bën thirrje që luftimet "të përfundojnë së shpejti" dhe se ka nevojë për "qasje urgjente në ndihmë humanitare", raporton La Reppublica.
Gaza
Ministria e Shëndetësisë në Gaza, e cila udhëhiqet nga Hamas, ka deklaruar se numri i të vrarë që nga fillimi i luftës me Izraelin më 7 tetor, ka shkuar në 27,947.
Institucioni palestinez ka shtuar se 67.459 të tjerë janë plagosur si pasojë e luftimeve të ashpra.
107 palestinezë janë vrarë vetëm në 48 orët e fundit.
Agjencia e Kombeve të Bashkuara për Fëmijët UNICEF u bëri thirrje të gjitha palëve që të përmbahen nga një përshkallëzim ushtarak në Rafah , në kufirin jugor të Rripit të Gazës, duke paralajmëruar se ka më shumë se 600,000 fëmijë në zonë.
Drejtoresha ekzekutive e UNICEF- it Catherine Russell tha se përshkallëzimi ushtarak në Rafah do të shënonte një tjetër pikë kthese shkatërruese në luftën që deri tani ka shënuar mbi 27 mijë viktima.
