Shefi i ekzekutivit deklaroi nga foltorja e Kuvendit se nuk e bën dot për asnjë bashkëpunëtor të tij atë që ka bërë Saliu për Bashën, kur shmangej nga drejtësia me raporte mjekësore. Ai tha prerë se çështja e Tahirit është nën hetim dhe se duhet të përgjigjet para drejtësisë kushdo që prek në dërrasë të kalbur.
“Më thua kam 4 javë që nuk flas për Saimir Tahirin. Por çfarë të them unë për Tahirin. Mua më takon të flas? Apo është detyra jote? Nuk është as e imja, e as e jotja, por është e atyre që po e hetojnë Tahirin dhe nuk të ka caktuar njeri ty të bësh as gazetarin, as prokurorin, as gjykatësin, dhe as gjykatën supreme. Ty të intereson vetëm pushteti, ndaj e po e bën këtë, jo për të vërtetën, dhe për pushtetin je gati të bësh llum çdo gjë.
Ta kesh të qartë, ta keni të qartë të gjithë, unë kam qenë dhe do jem gjithmonë ky. Unë bashkëpunëtorët i besoj të gjithë dhe mbroj deri në fund idetë që ndajmë, punën që bëjmë. Por unë nuk jam avokati i asnjë bashkëpunëtori, kush prek në dërrasë të kalbur, të shkojë e të përgjigjet aty ku duhet të përgjigjet. Nuk e bëj dot për askënd atë që bëri Saliu për ty, kur u akuzove dhe u shmange me raport mjekësor dhe s’u paraqite fare. Ndërkohë, ai merrte fjalën këtu dhe të mbronte, edhe kur ishte akuzuar nga Prokuroria. Kjo është gjëja më anormale që mund të bëjë një kryeministër. Unë s’e kam bërë kurrë dhe nuk kam për ta bërë, kam çfarë kam unë opinionet e mia për Prokurorinë, për mënyrën se si vepron, për këtë apo për atë, kjo është çështje tjetër. Kam folur vetëm për qëndrimin në këshillin për mandatet në PS, se e kam pasur për detyrë të shpjegoj qëndrimin, dhe aty ka mbaruar detyra ime për atë çështje. Tani ajo çështje i takon hetimit, drejtësisë, atyre gazetarëve që dinë të bëjnë investigime, por jo ty, e partisë tënde”, tha kreu i qeverisë.
d.c./shqiptarja.com