Në fshatat Vinjoll, Fushë-Milot dhe në Dajç të Lezhës dronët kanë zbuluar 694 bimë kanabisi të kultivuara në tokë. Sipas njoftimit të bërë nga Policia e Shtetit, kultivuesit e bimëve narkotike ende nuk janë gjendur.
Në kuadër të fazës së 11-të të operacionit policor të koduar ‘Imazhi’, nga kontrollet e kryera në zona të thella dhe të vështira malore, policia ka zbuluar 694 bimë kanabis.
Konkretisht në fshatin Vinjoll, Kurbin, u gjetën të kultivuara në tokë, 456 bimë kanabis, në fshatin Fushë Milot, Kurbin, u gjetën të kultivuara në tokë, në zonë të pyllëzuar, 171 kanabis, ndërsa në fshatin Dajç, Lezhë, u gjetën të kultivuara në një pronë publike, 67 bimë kanabis të tjera . Bimët narkotike u asgjësuan përmes djegies, ndërsa një pjesë e vogël e tyre u sekuestrua në cilësinë e provës materiale.
“Gjatë dhjetë fazave të mëparshme të këtij megaoperacioni, në zona të ndryshme të qarkut Lezhë, janë asgjësuar në total, 15 379 bimë narkotike cannabis sativa”-njofton policia.
Ndërsa, skuadra të posaçme policore, të pajisura me dronë, kanë vijuar kontrollet intensive në terren dhe nga ajri.Policia e Lezhës, në bashkëpunim me Prokurorinë Lezhë, vijon veprimet hetimore për gjetjen dhe arrestimin e autorit/ëve të kësaj veprimtarie kriminale.
Materialet procedurale i kaluan Prokurorisë, për veprime të mëtejshme.
