KUKËS- Policia vijon me kontrollet për goditjen e kultivimit te lëndëve narkotike. Një tjetër rast është identifikuar ditën e sotme, ku kryeplaku i fshatit Gurë-Klais, Masllam Marku 55 vjeç ka rënë në pranga pasi dyshohet se ka kultivuar lëndë narkotike. Gjithashtu, policia ka arrestuar edhe djalin Elvis Marku, 24 vjeç dhe vëllain e kryeplakut, Urim Marku 38 vjeç.
Kryeplaku i fshatit, në bashkëpunim me vëllain dhe djalin e tij kishte kultivuar bimë narkotike në vendin e quajtur "Kepi i kishës", të cilat iu asgjësuan me anë të djegies, ndërsa disa fidanë u morën në cilësinë e provës materiale.
Ndërkaq , policia ka proceduar në gjendje të lirë, inspektorin e Pyjeve, Ilmi Peposhi, i cili akuzohet për shpërdorim detyre dhe moskallëzim i krimit.
Materialet i kaluan Prokurorisë pranë Gjykatës së Shkallës së Parë Kukës, për veprat penale "Kultivimi i bimëve narkotike", "Shpërdorimi i detyrës" dhe "Moskallëzimi i krimit".
SI.E./ReportTv.al