KOSOVË- Presidentja e Komisionit Evropian, Ursula von der Leyen i ka dërguar kryeministrit të Kosovës, Albin Kurti një letër përmes së cilës i ka bërë thirrje që dialogu me Serbinë të vazhdojë sa më shpejtë të jetë e mundur.
Kryekomisionerja në letrën e dërguar për Kurti, ka shkruar se perspektiva e Bashkimit Evropian për vendet e Ballkanit Perëndimor mbetet një prioritet.
Ajo shkruan se BE mbështet Kosovës në rrugën e saj drejt integrimit dhe se duke pasur në konsideratë rëndësinë që ka liberalizimi i vizave për qytetarët kosovarë do të punohet në mënyrë që kjo ëndërr të bëhet realitet.
“Ne dëshirojmë që ta shohim avancimin më të shpejtë të Kosovës në rrugën e saj evropiane dhe do të vazhdojmë ta mbështesim progresin e arritur në reformat që i kërkon kjo. Duke e njohur rëndësinë që e ka për qytetarët e Kosovës, ne do të vazhdojmë të avokojmë për një vendim pozitiv të BE-së për liberalizimin e vizave”, shprehet ajo në letër.
Presidentja e Komisionit Evropian shprehet se e mirëpret zotimin e kryeministrit Kurti për t’u angazhuar në mënyrë konstruktive në dialogun Beograd-Prishtinë, të ndërmjetësuar nga BE.
Ursula von der Leyen ka thënë se është thelbësore që takimi tjetër i nivelit të lartë i dialogut të mund të zhvillohet sa më shpejt të jetë e mundur. Kjo, sipas saj, është thelbësore për progres në rrugën përkatëse evropiane të Kosovës dhe Serbisë dhe për qytetarët e vendeve.
“Pres me padurim që të punojmë së bashku për avancimin e marrëdhënieve BE-Kosovë”, shkruan ajo në letrën e saj.
Më 15 qershor është zhvilluar takimi i parë kokë më kokë, mes kryeministrit të Kosovës Albin Kurti dhe presidentin serb, Akeksander Vuçiç ku në fokus ishte dialogu mes dy vendeve.
Takimi i radhës mes dy liderëve botëror pritet të mbahet para fundit të korrikut.
J.GJ./ReportTv.al
