Kryeministri i Britanisë së Madhe, Boris Johnson ka paralajmëruar pasditen e kësaj të enjte për një izolim të tretë në fillim të vitit të ardhshëm nëse nuk respektohen masat që ka ndërmarrë shteti.
Ai tha se nëse do të lirojnë masat gjatë javëve të ardhshme dhe gjatë fundvitit si dhe duke i neglizhuar ato, do të rrezikojnë në një infektim më të madh e cila do të çojë sërish në një karantinë totale.
"Nëse i lehtësojmë masat tani, rrezikojmë të humbasim përsëri kontrollin e këtij virusi duke na detyruar të kthehemi në një bllokim kombëtar në fillim të vitit të ardhshëm" - tha Johnson.
Ndërkohë mjeku Chris Whitty u shpreh se do të ishte shumë e rrezikshme lehtësimi i masave gjatë Krishtlindjeve teksa u bëri apel qytetarëve që të evitojnë sa më shumë përqafimet dhe puthjet me të moshuarit.
Vetëm pak ditë më parë, kryeministri i Britanisë njoftoi për heqjen e karantinës totale në vend prej 2 dhjetorit dhe izolimin e saj në disa zona. Gjatë një deklarate, Johnson tha se këto masa do të qëndrojnë në fuqi për 4 muaj deri në mars me shpresën se një vaksinë ndaj COVID-19 do të jetë në treg deri atëherë.
E.M./ReportTv.al