Tre persona janë arrestuar nga policia e Korçës pasi u kapën duke transportuar kundrejt parave 31 emigrantë të paligjshëm. Policia thotë se në kuadër të operacionit të koduar "Perimetri" kanë goditur dy raste të tjera të aktivitetit kriminal në fushën e dhënies ndihmë shtetasve të huaj për kalim të paligjshëm të kufirit kundrejt shumave të parave.
Në pranga u vunë shtetasit A.H 37 vjeç nga Tirana, R. E., 18 vjeç nga Kruja.
"Këta persona në bashkëpunim mes tyre u kapën nga shërbimet e policisë në aksin rrugor Bilisht-Korçë, në afërsi të fshatit Malavec, duke transportuar me një mjet furgon tip "Benz" 12 emigrantë të paligjshëm, të cilëve kundrejt shpërblimit iu kishin premtuar kalimin drejt vendeve të BE-së", thuhet në njoftimin e policisë.
Po ashtu në pranga u vu edhe shtetasi R. V., 24 vjeç, banues në Tiranë, pasi ky shtetas u kap nga shërbimet e policisë në dalje të qytetit të Pogradecit, duke transportuar me mjetin "Hyundai", 19 emigrantë të paligjshëm të cilëve kundrejt shpërblimit iu kishte premtuar kalimin drejt vendeve të BE-së.
Materialet në ngarkim të tyre i kaluan Prokurorive të Rretheve Gjyqësore Korçë e Pogradec për veprën penale "Ndihma për kalim të paligjshëm të kufijve, kryer në bashkëpunim".
