Një banesë në Kukës është zbuluar nga policia pasi ishte shndërruar në ambient për kultivimin e kanabisit me anë të llambave. Në kërkim janë shpallur pronari i banesës i identifikuar si Kastriot Hasanaj, 51 vjeç dhe bashkëpunëtori i tij, i identifikuar si Hasan Spahiu, 28 vjeç.
Në kuadër të operacionit policor të koduar “First”, forcat blu evidentuan se njëra prej dhomave ishte përshtatur për të kultivuar bimë narkotike, me llamba. Në momentin e ndërhyrjes, nuk gjetën njeri në banesë, por zbuluan se si ambienti ishte shndërruar në ‘shtëpi bari’.
Pronari dhe bashkëpunëtori kishin mbjellë 934 fidanë të dyshuar narkotikë kanabis, të kultivuar në gota plastike, llamba elektrike, aspiratorë dhe aksesorë të tjerë që shërbejnë për ngrohje, të cilat u sekuestruan nga policia.
Në vijim të veprimeve u bë shpallja në kërkim e pronarit dhe bashkëpunëtorit për veprën penale "Kultivimi i bimëve narkotike" kryer në bashkëpunim.
K.T./ReportTv.al