Jufka me qofte shtëpie në salcë qumështi
Përbërësit:
500 gr jufka
500 gr mish të grirë
2 feta bukë të thekur të thërrmuar
1 qepë mesatare
2-3 thelpinj hudhër
1 kokerr vezë
1 tufë majdanoz
2 lgj gjalpë
2 lgj miell
1 gotë lëng mishi ose buljon perimesh
1 gotë salcë kosi
2 gota qumësht
1 lgj vaj ulliri
Kripë, piper
Përgatitja:
Fillimisht përgatisim qoftet. Bashkojmë mishin e grirë me bukën e thekur të thërrmuar, qepën dhe hudhrat e grira imët, vezën, kripën, piperin dhe 2 lugë qumësht. E punojmë mirë brumin e qofteve derisa përbërësit të lidhen dhe më pas realizojmë qofte të vogla rrumbullake. I vendosim qoftet njëra pas tjetrës me pak largësi mes tyre në një tavë dhe i vendosim për t’i pjekur në furrë të parangrohur për 15 minuta (derisa sipërfaqja e tyre të ketë marrë një ngjyrë të artë).
Ndërkohë përgatisim salcën me qumësht. Në një tigan të thellë tresim gjalpin në zjarr mesatar, shtojmë miellin dhe hudhrën e grirë dhe e kaurdisim për rreth 2 minuta. Më pas shtojmë lëngun e mishit, salcën e kosit dhe qumështin dhe e trazojmë derisa salca të marrë valë dhe të fillojë të trashet.
Paralelisht me përgatitjen e salcës kemi vendosur në zjarr dhe një tenxhere me ujë me pak kripë për jufkat. Pasi uji të ketë marrë valë hedhim jufkat dhe i lemë derisa të zbuten, por jo plotësisht. Më pas i kullojmë dhe i vendosim në një tavë të lyer me pak vaj ulliri. I mbulojmë jufkat me salcën e qumështit dhe në fund vendosim qoftet. E vendosim tavën në furrë të parangrohur në 180 gradë për 10-15 minuta.
MC/ReportTv.al