Policia arrestoi një pakistanez dhe një afgan të akuzuar për rrëmbim me qëllim të zhvatjes, dhunës seksuale, lëndimit dhe favorizimit të imigracionit të paligjshëm.
Viktima është një 17-vjeçare me origjinë siriane, e cila u arratis me familjen në Turqi gjatë luftës dhe prej andej, pas tërmetit të shkurtit 2023, në vendet e Bashkimit Evropian.
Ndërsa ndaj një shqiptareje, në kërkim për të njëjtin hetim dhe e pagjurmueshme është lëshuar nga policia një urdhër arresti.
Çështja është komplekse dhe hetimet kanë qenë të vështira. Gjatë udhëtimit për në Gjermani, vajza – me babanë, nënën, gjyshen dhe vëllain e saj – përfundoi në duart e trafikantëve që ndanin gratë nga burrat në Slloveni.
Të parët u braktisën në një shtëpi ferme në Reggio Emilia, të dytat në autostradën afër Udines. Më pas 17-vjeçarja u dërgua diku tjetër dhe familjarët e saj u detyruan të paguanin një shpërblim për lirimin e saj.
Gjatë asaj periudhe, sipas rindërtimit të ngjarjeve, ka pësuar abuzime dhe dhunë, duke përfshirë edhe një thyerje të krahut. 30 majin e kaluar ajo u gjet në Lodi nga një punonjëse karburanti në një zonë shërbimi dhe prej aty policia filloi hetimet.
Policia e koordinuar nga Prokuroria e Lodit dhe Prokuroria pranë Drejtorisë Antimafia të Qarkut të Bolonjës, arrestuan dy të huajt. U gjetën edhe dy automjete Mercedes të përdorur për të çuar familjen në Itali. Njëri nga të arrestuarit u kap në Kroaci, tjetri u ndalua nga oficerët e Shtabit të Policisë në Modena gjatë një kontrolli.
G.K/ReportTv.al