E mbuluar me mister është vrasja e 46-vjeçarit Altin Alikaj në Vlorë, trupi i pajetë i të cilit u gjet mëngjesin e sotëm në banesë nga e ëma, e cila sapo ishte kthyer nga Greqia.
Ngjarja u regjistrua në lagjen "24 Maji", teksa Alikaj ishte shpallur në kërkim që prej datës 11 shkurt, ndërsa denoncimin në polici e kishte bërë kushëriri i tij,
Në trupin e 46-vjeçarit është gjetur një plumb në shpatull, nga krahu i zemrës si dhe një frakturë në kokë, ku dyshohet se është goditur me sende të forta.
Burime bëjnë me dije se 46-vjeçari, i cili dyshohet se ishte përdorues droge, para disa kohësh ka qenë në Kosovë, ku pas një konflikti me disa persona të panjohur, ata i kanë mbajtur pasaportën, por Alikaj mundi të largohej duke ardhur ilegalisht në Shqipëri. Nuk dihet nëse këto fakte kanë lidhje me ngjarjen, ndërsa familjarët pretendojnë se vrasja e 46-vjeçarit ishte e mirëorganizuar.
Sipas tyre, autori apo autorët kanë helmuar qentë e komshinjve, në mënyrë që të mos lehnin për të sinjalizuar futjen e tyre në banesë dhe po ashtu kanë ulur automatin në shtëpinë e viktimës. Po ashtu ata kanë deklaruar se në banesë kanë gjetur edhe një sëpatë me gjak, me të cilën dyshohet se është goditur viktima.
Trupi është dërguar në morg, ku po i nënshtrohet ekspertizës mjekoligjore, teksa është e paqartë se përse banesa e tij nuk ishte kontrolluar prej kaq ditësh, edhe pse ishte denoncuar i zhdukur. Deri me tani janë shoqëruar tre persona nga policia e Vlorës, që kanë patur njohje me 46 vjeçarin, ndërsa po merret në pyetje edhe babai i tij.
Viktima Altin Alikaj
Ky është Altin Alikaj, 46 vjeçarit në Vlorë që u gjet pas 8 ditësh i vrarë në banesë.
Report Tv ka mësuar detaje të reja nga vrasja e 46 vjeçarit në Vlorë. Mësohet se ai është qëlluar me armë zjarri në shpatullën e majtë, e ndërsa ka një frakturë në kokë. 46-vjeçari para disa kohësh ka qenë në Kosovë dhe sipas burimeve i është mbajtur pasaporta, për motive që nuk duhen. Si rrjedhojë ka ardhur ilegalisht për në Shqipëri. Pas vrasjes Altin Alikajt i është marrë celulari.
