Hysen Zmijani, ish-mbrojtësi i Vllaznisë dhe Kombëtares ka qënë i ftuar dje në Arabinë Saudite. Në Riyadh, Al Nassr fitoi 4-3 kundër Al-Duhail në raundin e tretë të Champions League në Azi. 60-vjeçari shkodran nuk është harruar nga drejtuesit e klubit të Al Nassr, teksa Zmijani në vitin 1993 ka qenë pjesë e kësaj skuadre për disa muaj.
Ka qenë vetë ish-mbrojtësi i Kombëtares që ka njoftuar lajmin, teksa shijoi nga pranë edhe dopietën e Cristiano Ronaldos që shkëlqeu në duelin e djeshëm.
"Mora ftesë nga ekipi Al-Nassr për të parë nje ndeshje të Champions League. Po shikoj ndeshjen e ekipit që kam luajtur para 30 viteve 1993. Mund të them që ka një progres të jashtëzakonshëm në anën profesionale në mentalitetin e jetës së përditshme", shkruan Zmijani.
Veç Vllaznisë dhe Al Nassr, Zmijani ka qenë pjesë edhe e Ajaccio në Francë dhe St. Pauli në Gjermani, teksa ka veshur 36 herë fanellën e Kombëtares, duke shënuar edhe dy gola.
S.DH/ReportTv.al