Gentian Çaka, ish-anëtari i “Hakmarrjes për Drejtësi” që po vuan një dënim me 17 vite burgim në burgun e Peqinit është marrë i pandehur për akuzën e “Futjes së telefonit në ambjentet e vuajtjes së dënimit”.
Marrja të pandehur e Çakës është kryer nga prokuroria e Elbasanit, pasi kjo e fundit ka administruar një material hetimor prej policisë së burgjeve.
Një trup kontrolli e policisë së burgjeve ka kryer një verifikim blic në dhomën ku vuan dënimin Gentian Çaka, dhe ka gjetur aty një aparat telefon, që i përkiste atij.
Ndaj Çakës është ngritur akuza e “Futjes dhe Mbajtjes së një aparati telefoni” në ambientet e burgut të Peqinit.
Në ditët në vijim, i dënuari do përballet në gjykatë edhe për akuzën e mbatjes së telefonit në qeli, duke rrezikuar një dënim që varion nga 1 deri në 3 vjet heqje lirie.
Gentian Çaka është i vetmi nga ish-anëtarët e të ashtuquajturës “Hakmarja për drejtësi”, që ndodhet në burg pasi ka një dënim me 17 vjet.
Ndërsa pjesa tjetër e grupit janë të lirë pasi u deklaruan të pafajshëm nga gjykata e Apelit për Krime të Rënda. Çaka u arrestua në vitin 2015 nga forcat RENEA.
E.M./ReportTv.al