Nga sot, Maksim Et’hemaj do të jetë në krye të Autoritetit të Aviacionit Civil. Vendimi është marrë ditën e sotme nga Këshilli i Ministrave, i cili zëvendëson në këtë post Edlira Krajën.
Kjo e fundit e ka mbajtur pozicionin e drejtoreshës prej prillit të vitit të kaluar, kohë kur u largua nga detyra Krislen Keri, në kulmin e pandemisë, e ndërsa Et’hemaj ka mbajtur më parë postin e drejtorit të Divizionit Teknik në “Albcontrol”.
"Emërimin e drejtorit ekzekutiv të Autoritetit të Aviacionit Civil. Në mbështetje të nenit 100 të Kushtetutës dhe të pikës 1, të nenit 12, të ligjit nr.10233, datë 11.2.2010, “Për Autoritetin e Aviacionit Civil”, të ndryshuar, me propozimin e ministrit të Infrastrukturës dhe Energjisë, Këshilli i Ministrave. Vendosi: Z. Maksim Et’hemaj emërohet drejtor Ekzekutiv i Autoritetit të Aviacionit Civil. Ky vendim hyn në fuqi menjëherë dhe botohet në “Fletoren zyrtare”", thuhet në vendim.
Këshilli i Ministrave vendosi edhe që anëtari i këshillit drejtues të Aviacionit Civil, Etjen Xhafaj të zvendësohet nga Genc Resuli. Ky vendim është marrë me propozim të Ministrit të Infrastrukturës dhe Energjisë, Belinda Balluku.
B.K./ReportTv.al