Dy persona janë arrestuar për zjarrvënie në Berat dhe në Përmet, mes tyre një efektiv policie. Një 68-vjeçar është arrestuar në Përmet pasi një ditë më parë dogji një sipërfaqe tokë dhe 70 koshere me bletë në pronësi të fqinjit të tij. Në pranga ra Novruz Ismaili, 68 vjeç, banues në fshatin Kosinë, i cili fillimisht u vuri zjarrin barishteve të këqija në tokën e tij, por si pasojë e erës flakët dolën nga kontrolli dhe u përhapën në një sipërfaqe më të madhe.
Për pasojë u dogj edhe një sipërfaqe toke me bimësi dhe 70 koshere me bletë në pronësi të shtetasit R. N. Fatmirësisht flakët u vunë në kontroll dhe u shuan pa lejuar shkaktim të dëmeve të tjera nga zjarrfikësja, ndërsa tashmë 68-vjeçari do të përballet me akuzat e zjarrvënies.
Edhe një efektiv policie është arrestuar në Berat pasi gjatë kohës që ka djegur barërat e këqija në tokën e tij, flakët janë përhapur duke djegur një sipërfaqe tokë e mbjellë me ullinj dhe pemë frutore.
