Në tetor të vitit 2021 në Oslo kishte ndodhur një vrasje. Kishte humbur jetën 20-vjeçari, Hamse Adan.
Për këtë krim ishin shpallur në kërkim nga institucionet e Norvegjisë dy vëllezër nga Kosova, Visar dhe Valon Avdyli, 34 vjeç dhe 37-vjeç.
Në nëntor vitit të kaluar në Turqi, ishte arrestuar Valon Avdyli kurse sot në pranga ka rënë i vëllai Visari në Ferizaj, ka njoftuar Policia e Kosovës.
“Personi i arrestuar, me inicialet V.A., i lindur në vitin 1989, ishte i shpallur në kërkim ndërkombëtar nga autoritetet norvegjeze për veprën penale "vrasje" të kryer në Oslo më 07.10.2021. Personi i arrestuar përveç shtetësisë kosovare, posedon edhe shtetësi norvegjeze, ndërsa në momentin e arrestimit të njëjtit i është gjetur një armë zjarri si dhe disa pasaporta të shteteve të tjera të cilat me gjase janë te falsifikuara”, thuhet në njoftimin e Policisë së Kosovës.
Të dy vëllezërit nga Kosova kanë qenë më parë të dënuar për terrorizëm. Valon Avdyli u dënua për pjesëmarrje në organizatën terroriste ISIS, ndërsa Visar Avdyli u dënua se kishte tentuar t’i ofronte mbështetje materiale ISIS-it përmes vëllait të tretë, Egzon Avdylit.
B.K/ReportTv.al