Një 59-vjeçar ishte i dehur në timon kur është ndaluar nga policia në Berat. Pasi i kanë bërë testin, 59-vjeçari ka ka tentuar të korruptojë me 5.000 lekë por është arrestuar në vend.
Njoftimi i policisë Berat
Shërbimet e Policisë Rrugore, në vijim të punës për evidentimin dhe ndëshkimin e shkelësve të Kodit Rrugor, kanë goditur një rast të mitëdhënies.
Gjatë shërbimit, punonjësit e Policisë Rrugore, në rrugën automobilistike, pranë rrethrrotullimit të ish-kombinatit, kanë ndaluar për kontroll një mjet tip “Opel, me drejtues shtetasin B. V. Pasi testimit me aparatin Drager, ky shtetas ka rezultuar në gjendje të dehur, në masën 1.12 mg/l.
Për t’iu shmangur procedurave të mëtejshme ligjore, drejtuesi i mjetit ka tentuar t’i korruptojë punonjësit e Policisë Rrugore, duke iu ofruar një kartëmonedhë 5000 lekëshe.
Në përfundim të veprimeve procedurale, shtetasi B. V., 59 vjeç u arrestua në flagrancë për veprat penale “Drejtimi i automjeteve në mënyrë të parregullt” dhe “Korrupsioni aktiv i personave që ushtrojnë funksione publike”.
Materialet i kaluan Prokurorisë pranë Gjykatës së Rrethit Gjyqësor Berat, për veprime të mëtejshme.
K.T.//ReportTv.al