Një shtetas polak është ndaluar nga policia në pikën kufitare të Hanit të Hotit. 61-vjeçari Jan Stanek ishte i shpallur në kërkim ndërkombëtar nga shteti polak.
Falë edhe informacioneve të shkëmbyera nga Interpol Tirana dhe homologëve në Poloni u bë e mundur ndalimi i 61-vjeçarit, teksa ai po hynte në Shqipëri.
'Si rezultat i intervistimit të detajuar dhe shkëmbimit të informacionit ndërmjet Interpol Tiranës dhe homologëve në Poloni, të kryera në kuadër të megaoperacionit “Sundimi i ligjit”, për ndalimin e shtetasve të shpallur në kërkim kombëtar ose ndërkombëtar, u ndalua në hyrje të Shqipërisë, shtetasi polak Jan Stanek, 61 vjeç.', thuhet në njoftimin e policisë.
Ai ishte dënuar nga autoritetet gjyqësore në Poloni me 4 vite e 6 muaj burg për vjedhje dhe krime në fushën e narkotikëve.
Ndërkohë tashmë vijojnë procedurat për ekstradimin e tij në Poloni.
G.K//ReportTv.al