Gjykata e Lartë në Teheran konfirmoi një dënim me vdekje për një burrë dhe një grua për kryerjen e tradhtisë bashkëshortore, pasi vjehrri i të dënuarit refuzoi ta falte atë, raportoi gazeta Shargh në Iran.
Gazeta raportoi se në fillim të këtij viti, bashkëshortja e burrit të dënuar, ka paraqitur në polici video kasetat që vërtetojnë ekzistencën tradhtisë dhe një lidhjeje mes burrit të saj 27-vjeçar dhe një gruaje 6 vjet më të madhe se ai.
E ndërsa ankuesja është kthyer dhe ka falur të akuzuarin, babai i saj ka refuzuar dhe ka kërkuar nga autoritetet gjyqësore që ndaj tyre të zbatohet dënimi maksimal, sipas të njëjtit burim.
Gazeta theksoi sot se Dhoma e 26-të e Gjykatës së Lartë e ka konfirmuar aktgjykimin “në bazë të kasetave dhe rrëfimeve të të akuzuarve”.
Sipas ligjeve iraniane, dënimi për tradhtinë bashkëshortore mund të arrijë deri në dënimin me vdekje, por i takon gjyqtarit të përcaktojë mjetet e ekzekutimit, duke përfshirë edhe gjuajtjen me gurë deri në vdekje.
Ligjet iraniane lejojnë gjithashtu që të mos zbatohet dënimi maksimal nëse familja e viktimës e konsideron të dënuarin të falur.
Irani kritikohet nga raportet e lëshuara periodikisht nga Kombet e Bashkuara dhe organizatat ndërkombëtare të të drejtave të njeriut, duke akuzuar Teheranin për keqmenaxhimin e burgjeve dhe trajtimin e të burgosurve.
Sipas Amnesty International me qendër në Londër, Irani kreu 246 dënime me vdekje në vitin 2020.
M.Q./ReportTv.al