Baleti "Gravity" me koreografi të Angelin Preljocaj çel edicionin e dytë të Festivalit Ndërkombëtar të Kërcimit Bashkëkohor. Në Teatrin e Operas, spektakli i dancit që mbahet në bashkëpunim me Qendrën Kulturore të Artit Bashkëkohor "Harabel", pret publikun sot e nesër në orën 19.00.
Kompozitorja Blerina Shalari, me artistë të përzgjedhur, jetëson këtë mbrëmje në orën 19.00 në qendrën kulturore pranë Katedrales Ortodokse koncertin "Homeriada" me krijimtarinë e saj muzikore.
Hyrja është e lirë në mbrëmjen muzikore "Tinguj për Tiranën" që bën bashkë sot në orën 19.00 në Amfiteatrin pranë Liqenit artistë vendas e të huaj, me emra si Josif Gjipali, Ardita Meni, Kastriot Tusha e të tjerë muzikantë të talentuar.
Në Qendrën Kombëtare të Librit dhe Leximit mbahet sot në orën 18.00 një takim letrar me autorin Andrin Kabashi, fitues i Fondit Letrar për të Rinj.
Me 192 produksione premierë në Shqipëri, Festivali Ndërkombëtar i Filmit “Tirana Film Fest”(TIFF) vijon sot të shfaqë nga ora 10.00 deri në orën 22.15 video e filma artistikë, dokumentarë, filma të animuar, në Liceun Artistik, kinema ‘Millenium’ dhe Qendrën dhe Artit “Agimi”.
Në 80-vjetorin e saj të lindjes, Biblioteka Kombëtare ka çelur një ekspozitë me krijimtarinë e shkrimtares dhe përkthyeses Helena Kadare.
Çelet sot në orën 19.00 në galerinë "Fab" në Tiranë ekspozita personale e artistit Mumtas Dhrami "Kujtime nga Kina, 1967".
Në bashkëpunim me Fondacionin “Papa Klementi XI Albani” dhe në kuadër të “Ditëve Evropiane të Trashëgimisë”, vendoset sot në mjediset e Pavijonit të Mesjetës të Muzeut Historik Kombëtar busti i Klementi XI Albanit shoqëruar me disa dokumente shenjtërisë së tij.
Nga sot në orën 18.30, për tri net radhazi, mbahet në teatrin 'Skampa' në Elbasan, edicioni i 8-të i Festivalit "Takimi Kombëtar i orkestrave të harqeve, muzikës së dhomës dhe krijimtarisë së saj", i drejtuar nga Blerim Narazani.
M.T//ReportTv.al