KORÇË- Një banesë ka rënë pre e grabitjes në orët e para të mëngjesit të kësaj të hëne në qytetin e Korçës. Ngjarja ka ndodhur rreth orës 06:10, në lagjen nr. 1, në rrugën e "Bilbilave", ku tre persona të maskuar kanë grabitur banesën e kambistit të identifikuar si Shefqet Muço.
Report Tv mëson nga burime zyrtare se kanë qenë 3 autorë, 2 prej të cilëve kanë arritur që të marrin një sasi të konsiderueshme të lekëve, e ndërsa i treti është arrestuar, kjo pasi ky i fundit u përlesh me të zotin e shtëpisë, e për pasojë mbeti i lënduar.
Për gazetaren e Report Tv, Gladiola Hoxha, fqinjët tregojnë se u zgjuan në mëngjes nga ulërimat e familjes Muço. Një prej autorëve, aktualisht i arrestuar, është përleshur me Muçon. Ky i fundit ka marrë plagë në kokë, teksa të lënduar ka mbetur edhe gruaja dhe djali tij.
Report Tv mëson se autori që ka kryer grabitjen është Agim Çoçi, rreth moshës 50-vjeç. Ai është në spital pasi ka marrë lëndime për shkak se është përleshur me kambistin. Ai është nga Moglica, por banues në Durrës.
Detaje të reja kanë dalë në dritë nga grabitja e kambistit në Korçë. Sipas burimeve, mësohet se kambistit i janë grabitur 10 mln lekë.
Një nga fqinjët tregon se si ka ndodhur grabitje, teksa zbulon edhe për përleshjes së kambisti ka pasur me një nga autorët.
“Katër thotë ato, po unë i pashë katër. Pashë vetëm një që Shefqeti e kishte vënë poshtë, Shefqeti i gjakosur këtej, gruaja e goditur, djali i tij ka ndrydhur dorën, unë vajta vetëm sa ia hoqa nga dora. I vajti tjetri me pistoletë i tha lëshoje, Shefqeti i tha “nuk e lëshoj më vrit”. U pashë me doreza autorin, për të mos e vrarë fare e hoqa Shefqetin, lëre se vjen policia. E kanë goditur Shefeqtin te koka, iu gjend e gjithë lagjja në ndihmë”, tregon ai.
Një tjetër fqinj tha se doli jashtë sapo dëgjoi ulërimat dhe i dha ndihmë të zotit të shtëpisë pasi ishte i gjakosur.
“Dëgjova ulërima, dola nga shtëpia, erdha i pashë. Ishte gjakosur i zoti i shtëpisë”, rrëfen një tjetër fqinj.
Report Tv mëson se kambisti, banesa e të cilit ra pre e grabitjes orët e para të mëngjesit të sotëm është Shefqet Muço, teksa Report Tv sjell pamje nga vendi i ngjarjes. Sipas dëshmisë së të afërmve, kjo është e disata herë që ndodh.
