Në mesin e debatit se kush e zotëron Partinë Demokratike dhe kush ka legjitimitetin për ta drejtuar atë, Gjykata e Tiranës dha të parin vendim që zyrtarizon në krye të partisë, Lulzim Bashën.
Gjykata regjistroi ndryshimet në statutin e PD-së dhe të gjitha vendimet e Kuvendit Kombëtar, të 17 korrikut 2021 që Lulzim Basha e mblodhi në pallatin e Kongreseve, ende pa marrë vendim për përjashtimin e Sali Berishës nga grupi parlamentar pas shpalljes non grata nga SHBA.
Por çfarë përmbajnë ndryshimet statusore në PD?
Të propozuara nga Lulzim Basha 11 ndryshimet që morën miratimin e strukturave drejtuese në PD preknin vetëm anën organizative të partisë, por që 8 muaj pas Kuvendit të korrikut, legjitimimi i statutit në mars, duket të mos i shërbejë as Bashës, që me shpërthimin e krizës me demokratët e përcarë mes 2 kampeve, nuk i ka zbatuar dot ndryshimet statutore që dhe vetë Berisha në atë kohë i votoi.
Me këto ndryshime, u zgjerua kryesia e PD. Pjesë e saj u bënë për herë të parë Kryetari i Këshillit Kombëtar, Kryetari i Komisionit Zgjedhor si dhe i Apelimit ndërsa u shtuan Sekretarët.
Edhe te kompetencat e Kryesisë pati ndërhyrje. Të drejtën për të vendosur mbi koalicionet dhe marrëveshjet politike, Basha ia kaloi Këshillit Kombëtar, i cili po ashtu iu nënshtrua ndryshimeve, duke parashikuar ndarjen në Departamente të tij, ndryshim që për shkak të zhvillimeve që pasuan në selinë blu nuk u realizua kurrë.
Ndonëse statuti i 17 korrikut sanksionoi që edhe kryetari i Këshillit Kombëtar të zgjidhej me votim të fshehtë mes të paktën dy kandidaturave, ky ndryshim nuk u respektua kurrë. As Edi Paloka nuk u zgjodh me rival dhe as me votim të fshehtë, por u propozua nga Basha dhe u miratua me ngritje dore. E njëjta procedurë, edhe në zgjedhjen e Arta Sakjes, pas shkarkimi të Palokës në dhjetor kur shfaqi qëndrimet pro Berishës.
Ndryshimet përfshinë edhe krijimin e Këshillit Koordinues të qarkut që do të përbëhej nga drejtuesit politikë, pa të cilët, 8 muaj më pas, Basha ka mbetur në pjesën më të madhe të qarqeve të vendit.
Në ndryshimet e bëra, qoftë në statutin e 17 korrikut, por qoftë edhe atë të dhjetorit, Basha la pa prekur pozicionin e kryetarit të partisë, që sipas kundërshatëve të tij duhet të ketë një mandat 4-vjecar dhe pa të drejtë rikandidimi, në rast se humbet zgjedhjet.
Në Gjykatë është në pritje të një date shqyrtimi, edhe kërkesa e Sali Berishës për të marrë vulën e drejtësisë mbi ndryshimet statutore dhe vendimet e kuvendit të 11 dhjetorit që shkarkoi nga drejtimi i PD-së Lulzim Bashën dhe ndryshoi logon dhe vulën e selisë.
Me “fitoren” e parë në gjykatë, sfida e radhës për Lulzim Bashën është të regjistrojë ndryshimet e rëndësishme që i bëri statutit më 18 dhjetor kur mblodhi Kuvendin që i ndaloi çdo personi të shpallur non grata të marrë pozicione drejtuese në parti.
Ndryshimet në statutin e PD më 17 korrik 2021
(Kliko këtu për të lexuar dokumentin e plotë)
//ReportTv.al
Komente
Ka ardhur dhe kaluar koha per Saliun! Jeniceret e Saliut,sigurisht kane gjetur treg te mire! Nuk besoj se ka deputet qe te hyje perseri nen hijen e vrasesit Sali!
Përgjigju