Rrëzohet një tjetër rekurs i Jamarbër Malltezit në Gjykatën e Lartë.
Dhëndri i Berishës dhe studio 'Pustina' bashkëankimuan në Gjykatën e Lartë sekuestrimin e disa dokumentave dhe kompjuterave në kuadër të hetimeve për privatizimin e ish-klubit Partizani.
Ky ankimim u rrëzua nga Gjykata e Lartë duke lënë në fuqi sekuestrimin e dokumentave pasi më herët, po Gjykata e Lartë la në fuqi edhe sekuestrimin e pasurive të Malltezit në kuadër të hetimeve.
Bëhet fjalë për 25 pasuri të tij, të sekuestruara me kërkesë të SPAK. Përveç kësaj edhe kërkesa e Malltezit për heqjen e masës së arrestit shtëpiak u rrëzua nga GJKKO para pak ditësh, më 8 prill, së bashku me kërkesën për ndryshim mase të bërë nga Sali Berisha.
Sali Berisha dhe dhëndri i tij Jamarbër Malltezi ndodhen prej muajsh në masën arrest shtëpie. Berisha akuzohet për korrupsion pasiv kryer në bashkëpunim, neni 260 dhe 25 i Kodit Penal lidhur me privatizimin e ish kompleksit Partizani, ndërsa Jamarbër Malltezi akuzohet për korrupsion pasiv në bashkëpunim, Neni 260 dhe Pastrim i Produkteve për të njëjtën dosje.
G.K/ReportTv.al
