Pak ditë na ndajnë nga gara për kreun e ri të PD, për të cilin Sali Berisha ka përballë vetëm kandidatin Ibsen Elezi. Berisha do të nisë turin e takimeve ditën e sotme në orën 17:00 me mbështetësit e tij në Elbasan.
Ndërsa kandidati Ibsen Elezi do të takohet me simpatizantët demokratë nesër në orën 10:00 në Kukës dhe në 11:30 në Has. Po ashtu, Berisha do të takohet me mbështetësit e tij në Fier ditën e nesërme në orën 18:00.
Data 22 maj për zgjedhje të kryetarit të ri të PD u caktua nga Kuvendi i 30 prillit, ndërsa duket se do të zhvillohen në një kohë kur gjykata ende nuk e ka thënë fjalën e fundit se kujt i përket drejtimi i selisë blu. Nëse kjo e fundit nuk do të vendosë në favor të Komisionit të Rithemelimit, PD-së do t'i duhet të hapë një tjetër garë pa kryetar, pasi ajo drejtohet nga Enkelejd Alibeaj që prej dorëheqjes së Lulzim Bashës më 21 mars.
