Flamurtari dhe Partizani dhurojnë emocione dhe rivalitet në ndeshjen e tretë finale në basketboll për femra me ekipin vlonjat që në fund fiton me rezultatin 77-66. Flamurtari kryeson me ndeshje 2-1 dhe nëse fiton takimin e katërt në kryeqytet shpallet kampion. Nga ana tjetër Partizani do të kërkojë fitoren në ndeshjen tjetër për të lënë gjithçka në takimin e pestë për te vendosur titullin.
Ndeshja e luajtur në Vlorë ka qenë me rivalitet deri në 10 minutat e treta ku ekipi vlonjat arrin të shkëputet. 10 minutat e para mbyllen 17-16 ndërsa në fund të 10 minutave të dyta shifrat janë 37-34 për Flamurtarin. Ekipi vlonjat zhvillon një periudhë të tretë shumë të mirë duke shkuar deri 14 pikë diferencë dhe mbyllur këto 10 minuta në shifrat 61-47.
Edhe në 10 minutat e fundit ekipi vlonjat administron rezultatin ndërsa Partizani përpiqet por pa arritur të shkaktojë surprizën. Mbyllet përfundimisht 77-66 për Flamurtarin. Mirela Lugaj më e mira lojtare në fushë konfirmon se tashmë Flamurtari do të kërkojë titullin në ndeshjen e katërt.
Takimi i katërt do të luhet në Tiranë me ekipin vlonjat që kërkon titullin ndërsa Partizani për të barazuar gjithçka ne takimet mes tyre dhe vendosur çështjen e titullit në ndeshjen e pestë finale.
//ReportTv.al