Fier - Një 30-vjeçar shqiptar është arrestuar ditën e sotme nga policia e Fierit për llogari të Spanjës, pasi ishte shpallur në kërkim nga kjo e fundit për veprimtaritë kriminale të kultivimit dhe trafikimit të narkotikëve, si dhe të vjedhjes së energjisë elektrike, të kryera në kuadër të grupit kriminal.
Policia njofton se 30-vjeçari i identifikuar si Etmir Pazaj, i cili akuzohet se është pjesë e një grupi kriminal, në vitin 2022, në qytetet Barcelonë dhe Girona, në Spanjë, kultivoi sasi të konsiderueshme cannabis sativa, në ambiente të mbyllura, nëpërmjet llambave që furnizoheshin me energji elektrike të vjedhur.
"Si rezultat i aksioneve intensive gjurmuese dhe lokalizuese për kapjen e shtetasve të shpallur në kërkim ndërkombëtar, të cilat kryhen të bazuara në inteligjencën policore, në kuadër të megaoperacionit “Sundimi i ligjit” dhe falë shkëmbimit të vazhdueshëm të informacioneve ndërmjet zyrave homologe të Interpolit, u finalizua operacioni policor i koduar “Cities”.
Gjatë operacionit, u lokalizua, u kap dhe u arrestua provizorisht, për t’u ekstraduar në Spanjë, shtetasi i shpallur në kërkim ndërkombëtar E. P., 30 vjeç",-njofton policia.
Gjykata e Madridit i ka caktuar 30-vjeçarit, masën e sigurisë “Arrest në burg” dhe në ditët në vijim pritet t’u dorëzohet autoriteteve spanjolle.
K.M/ReportTv.al