Vijon të rritet numri i shtetasve shqiptarë të cilët dalin nga Greqia dhe hyjnë në vendin tonë.
Në pikën e kalimit kufitar të Kapshticës gjatë ditëve të fundit është vënë re rritje e numrit të personave që hyjnë në tokën shqiptare.
Burime pranë pikës së kalimit kufitar në Kapshticë bëjnë të ditur se gjatë 24 orëve të fundit kanë hyrë 552 persona dhe 133 mjete të tonazhit të rëndë.
Aktualisht në këtë pikë po punohet me 2 sportele ndërsa pritet që në ditët ne vijim numri i shtetasve që do të hyjnë nga Greqia në Shqipëri të rritet edhe me tej për shkak të festave të fundvitit.
Në Pikën e Kalimit Kufitar të Kapshticës, pas masave të vendosura nga shteti grek lejohet hyrja e mjeteve të tonazhit të rëndë dhe e këmbësorëve.
Në prag të festave të fundvitit shtohet dhe numri i personave që futen në Shqipëri për të kaluar këtë periudhë me familjarët e tyre.
Edhe në portin e Durrësit, këtë të dielë është vënë re një rritje e fluksit të udhëtarëve që hyjnë në vendin tonë.
Autoriteti Portual i Durrësit njofton se ditën e sotme priten që të hyjnë në Shqipëri, 3800 udhëtarë, me 3 tragete, 2 nga Bari dhe 1 nga Ankona.
Aktualisht porti po punon me kapacitet të plotë duke vendosur në funksion 20 sportele.
Ndërkohë janë shtuar dhe masat anti-COVID ku monitorohet gjendja shëndetësore e udhëtarëve në momentin e mbërritjes në port.
