Pas një hetimi një mujor, dy persona kanë rënë në pranga, pasi shpërndanin kokainë në zona të ndryshme të qytetit të Korçës, si dhe mbanin armë të ftohta në banesat e tyre.
Pasi ishin vënë prej një muaji nën vëzhgim nga policia, dy të arrestuarit të cilët shpërndanin kokainë në doza të vogla, si edhe posedonin armë të ftohta në banesat e tyre janë vënë në pranga.
Në kuadër të operacionit "Night Sales 5", u arrestuan Ilirjan Bardhushi dhe Lajdon Lamllari.
Gjatë kontrolleve të ushtruara në banesat e Ilirjan Bardhushit dhe Lajdon Lamllarit, uniformat blu gjetën rreth 500 gramë kokainë, një pjesë e saj e ndarë doza, 2 peshore elektronike, mjete që shërbenin për ndarjen e lëndës narkotike në doza, shuma parash në valuta të ndryshme, të dyshuara të përfituara nga veprimtaria kriminale, 1 bajonetë metalike, 1 thikë, 1 automjet tip "Nissan" dhe 4 celularë, të cilët u sekuestruan në cilësinë e provës materiale.
Gjithashtu, në vijim të veprimeve procedurale nisi procedimi në gjendje të lirë për E. Ll., pasi kishte dijeni për veprimtarinë kriminale që ushtronin 2 të arrestuarit, por nuk ka kallëzuar në organet e rendit.
Materialet procedurale i kaluan Prokurorisë Korçë, për veprime të mëtejshme.
M.T/ReportTv.al
