Romelu Lukaku për pak orë do jetë në Milano për të veshur edhe njëherë fanellën e Interit. Lajmin e ka konfirmuar CEO i klubit ziklatër Beppe Marotta, i cili është shprehur se ‘me shumë mundësi në orët e ardhshme belgu do jetë në Milano’.
Rikthimi i tij vetëm pas një viti te Interi është i bujshëm, por vështirë se sonte Lukaku do ketë njerëz për ta pritur në aeroport. Tifozët ultras të Interit ‘Curva Nord’ nuk e kanë falur për ‘tradhëtinë’ e sezonit të kaluar, teksa u largua në një periudhë të vështirë për klubin. Ata kanë bërë thirrje që asnjë tifoz ultras të mos jetë në aeroport kur të mbërrijë 29-vjeçari.
Inter riktheu Lukaku-n në Milano duke e marrë në huazim nga Chelsea pasi në klubin londinez Lukaku humbi shkëlqimin që kishte në Itali. Sulmuesi është huazuar për 12 muaj, por ekziston mundësia që të mos e ndërpresë më aventurën me Interin.
Ne.k./ReportTv.al