Disa punonjës policie i kanë ardhur në ndihmë një turisti të huaj në Sarandë, i cili kishte humbur në afërsi të hotelit ku ishte akomoduar, portofolin me dokumente dhe para.
Gjatë patrullimit pranë bregdetit të Himarës, efektivët e “Shqiponjës”, kanë gjetur në tokë në afërsi të një hoteli, një portofol me një shumë parash, karta bankare dhe një pasaportë të shtetit të Kuvajtit.
Sakaq, policët e kanë dorëzuar portofolin në komisariat dhe pas verifikimeve të personelit të hotelit në afërsi të të cilit u gjet portofoli, rezultoi se pasaporta që u gjet në këtë portofol i përkiste një turisti nga Kuvajti që ishte akomoduar në këtë hotel, i cili është paraqitur për të marrë portofolin e tij.
Turisti ka falënderuar punonjësit e Policisë, për gjestin dhe korrektësinë e treguar.
Gjithashtu, raportohet edhe për dy raste të tjera të gjetjes së sendeve të humbura të pushuesve, të cilat janë dorëzuar tek pronarët e tyre.
Në Himarë, uniformat blu i kanë dorëzuar një tjetër turisti të huaj, portofolin që ai kishte humbur në një rrugë në Himarë.
Portofoli i turistit të moshuar holandez ishte gjetur dhe ishte dorëzuar në Komisariat, nga një banor i Himarës. Turisti nga Holanda, pasi ka marrë portofolin, në Komisariatin e Policisë Himarë, ka falënderuar punonjësit e Policisë dhe qytetarin, për gjestin e tyre.
Ndërsa në Vlorë, një tjetër shtetasi të huaj, i është kthyer portofoli me një shumë parash dhe karta banke, të cilat i kishte humbur ditën e sotme.
Portofoli është gjetur në afërsi të një lokali, nga një pushues, ia cili ia ka dorëzuar punonjësve të Policisë që po patrullonin në zonë. Shtetasi i huaj falënderoi shtetasin që i gjeti portofolin dhe punonjësit e Policisë, për gjestin e tyre.
M.T/ReportTv.al
