Maliq Skënderi, 62-vjeç është arrestuar nga policia në Gjirokastër, pasi është kapur me armë zjarri si dhe me pajisje që përdoren për kultivimin e bimëve narkotike në ambiente të mbyllura, ndërsa dyshohet se do të ndërtonte një laborator për kultivim kanabisi.
62-vjeçarit, banues në Lazarat, iu gjetën në shtëpi 2 armë zjarri pistoleta, 10 krehra, 157 fishekë dhe pajisje që përdoren për kultivimin e bimëve narkotike në ambiente të mbyllura, si: 26 përforcues energjie elektrike, 2 filtra që shërbejnë për pastrimin e ajrit, 7 tuba që shërbejnë për ventilimin e ajrit, llamba dhe projektorë që shërbejnë për transferim nxehtësie, 4 ngrohëse me gaz dhe pajisje të tjera elektrike.
Në kuadër të operacionit ‘Last Winter’, në banesën e Maliq Skënderit, u konstatua lidhje e paligjshme e energjisë elektrike.
Materialet në ngarkim të tij i kaluan Prokurorisë pranë Gjykatës së Shkallës së Parë Gjirokastër, për veprat penale "Prodhim dhe mbajtja pa leje e armëve, armëve shpërthyese dhe municionit", "Përdorimi i paligjshëm i teknologjisë së lartë" dhe "Vjedhja e energjisë elektrike".
M.Q./ReportTv.al