Dita e madhe e jetës për Kristjan Asllanin mbërriti. Mesfushori 20-vjeçar i kombëtares ishte mëngjesin e së mërkurës për të kryer vizitat mjekësore në qendrën ‘Humanitas’ për llogari të Interit.
Elbasanasi prej ditësh kishte arritur akordin për të kaluar te zikaltërit të cilët paguan 4 milionë euro për huazim, 10 milionë euro të tjera do jepen për blerjen përfundimtare plus 2 milionë që do jenë në formë bonusesh. Operacioni në total për Asllanin kap vlerën e 16 milionë eurove që shkojnë për Empolin plus huazimin e Martin Satrianos.
Sezonin e kaluar Asllani luajti për herë të parë në Seria A, por arriti të impresiononte dhe Empoli e kishte ta pamundur ta mbante.
Ndërkohë mëngjesin e sotëm në Milano ka zbarkuar edhe goditje e madhe e merkatos për Interin, Romelu Lukaku. Belgu ashtu si shqiptari ka kryer sot vizitat mjekësore dhe quhet zyrtarisht i zikaltërve. Një rikthim pas një viti te Chelsea që e bleu për 113 milionë euro.
‘Jam shumë i lumtur për këtë rikthim’ u shpreh Lukaku për të cilin Interi pagoi 8 milionë euro për huazimin 1-vjeçar dhe 4 milionë të tjera në formë bonusesh.
