DIBER- Rreth 80 nxënës të fshatit Kllobçisht në Njësinë Administrative Maqellarë në Dibër braktisë mësimin, pasi janë kundër vendimit për mbylljen e shkollës dhe transferimin e tyre në fshatin Kërçisht.
Prindërit e tyre protestuan edhe tek shkolla e fshatit ku deklaruan se e refuzojnë këtë lëvizje të fëmijëve, në kohën kur shkolla e fshatit afron të gjitha kushtet.
“Nuk do i dërgojmë. Pa shkollë do i lejmë. Shiko çfarë shkolle është, çfarë fshati është. Do i lëmë pa shkollë”, tha një prind.
“Nuk jemi dakord të çojmë as 8 vjeçare dhe as filloren në Kërçisht. I sjellin nënat dhe baballarët këtu. I kemi kushtet e mira”, tha një tjetër.
Prindërit thonë se transferimi i nxënësve është i paargumentuar pasi shkolla e fshatit të tyre ka më shumë nxënës se ajo që është kërkuar t’i transferojnë.
“Ne i duam këto. E kemi shkollën këtu. Nuk jemi dakord të çojmë nxënës atje. Kemi dhënë firma që nuk jemi dakord ti çojmë në Kërçisht. Edhe dy fshatra të tjerë i ka përballu kjo shkollë. Kanë ikur nxënësit në emigrim”, tha një tjetër.
Nëse autoritetet nuk tërheqin vendimin, prindërit thonë se bojkotimi i mësimit nga fëmijët e tyre do të vazhdojë edhe në ditët në vijim.
S.G//ReportTv.al