Kryeministri i Kosovës, Albin Kurti, ka thënë së pas takimit të kryenegociatorëve në Bruksel është rënë dakord që në marrëveshje teksti i deklaratës thotë se personat e pagjetur do të emërtohen si “personat e zhdukur me dhunë”.
“Ne do të analizojmë së bashku rezultatet nga takimi i 4 prillit dhe do të përcaktojmë një ecje përpara për muajin prill ku do të ketë një takim të nivelit të lartë”, bëri me dije Kurti.
Në takimin e Ohrit më 18 Mars Kosova dhe Serbia arritën dakordësi për një sërë çështjesh, por Beogradi dha shenja tërheqjeje.
Për pasojë nuk kanë munguar thirrjet e vazhdueshme nga SHBA e BE për zbatim të dakordësisë së arritur.
Kujtojmë se më 18 mars, në Ohër të Maqedonisë së Veriut, Kurti dhe Vuçiç pas më se 10 orësh bisedime, arritën marrëveshje për zbatimin e propozimit evropian. Në Ohër, Kosova dhe Serbia u pajtuan për aneksin e zbatimit të një propozimi të BE-së për normalizimin e marrëdhënieve Kosovë-Serbi, të pranuar parimisht gjatë një takimi në Bruksel, më 27 shkurt. Propozimi i BE-së nuk e obligon Serbinë që ta njohë Kosovën, por kërkon nga të dyja vendet që t’i njohin dokumentet e njëra-tjetrës, si: pasaportat, diplomat dhe targat e makinave. SHBA-ja e ka mbështetur propozimin e BE-së, i cili më herët është njohur edhe si plani franko-gjerman.
G.MO/ReportTv.al