Në seancën e parë të këtij sesioni parlamentar, ish-kryeministri deklaroi se situata e medieve në vend është katastrofave, duke shtuar se Rama po poshtëron gazetarët si askush tjetër në faqen e dheut.
“Çdo gjë tjetër është, por jo Parlament. Jam këtu për të denoncuar qëndrimin banditesk, të turpshëm të kryeministrit, i cili si askush tjetër në faqen e dheut kalon para një grup njerëzish dhe u thotë ‘mirëmëngjes kazan’. Kjo fyerje kolektive, ky poshtërim, ndaj një grupi vajzash dhe djemsh, që bëjnë informimin e publikut, përbën një ndër aktet më të pashembullta të paranojës, të skizës, të kulturës staliniste.
Të vërsulesh ndaj medieve të vendit me fjalën përmbledhëse ‘kazan’ do të thotë se ke përzgjedhur fyerjen më të rëndë se çdo përmbajtje e kazanit, do të thotë se kafshërisht nuk kënaqesh me etiketimin me një nga përmbajtjet, po do të vërsulesh mbi ta cdo përmbajtje të kazanit. Kërkoj një rezolutë, që do të titullohet ‘rezoluta e llum kazanit’, që do të dënojë njeriun që mban postin e kreut të ekzekutivit dhe përdor fuqinë e postit për ofendim kolektiv, që mund ta dëgjosh vetëm në spitalet psikiatrike.
Akt të shëmtuar kemi, kur një gazetare denoncoi vëllain e Ramës, Olsin, si eksponent të një bande, llum kazani i dërgon mesenxherin për ta kërcënuar. Kur ajo merr guximin dhe hedh poshtë kërcënimet e një mafiozi ky i ndërpret rrogën. Situata e medieve është katastrofale, ndaj kërkoj të vihet në rend dite rezoluta e llum kazanit", tha Berisha.
d.c./shqiptarja.com