Bashkimi Europian ka arritur një marrëveshje për fazën e parë të një plani për të përdorur të ardhurat e aseteve të ngrira ruse për rindërtimin e Ukrainës, njoftoi Belgjika, e cila mban presidencën gjashtëmujore të Këshillit Europian.
Marrëveshja çon përpara një debat të gjatë dhe të vështirë ligjor mbi mënyrën e përdorimit të aseteve shtetërore ruse që u sekuestruan nga institucionet perëndimore menjëherë pasi Rusia pushtoi Ukrainën dy vjet më parë.
Bashkimi Europian ka angazhuar fonde prej 200 miliardë eurosh të Bankës Qendrore të Rusisë. Rreth 90% e këtyre fondeve menaxhohen nga Euroclear, një organizatë ndërkombëtare me bazë në Belgjikë.
Opsioni i konfiskimit të këtyre fondeve dhe përdorimit të tyre për rindërtimin e Ukrainës është përjashtuar sepse do të rrezikonte të tronditte tregjet ndërkombëtare dhe të dobësonte euron.
Një numër vendesh, përfshirë Belgjikën, kanë propozuar vendosjen e një takse mbi fondet e ngrira, e cila mund të sjellë rreth tre miliardë euro në vit të ardhura për Kievin, raporton gazeta amerikane Barrons.
Komisioni Europian u ka paraqitur 27 vendeve anëtare një propozim të moderuar që parashikon që menaxherët e këtyre fondeve, si Euroclear, fillimisht duhet të ndajnë interesat dhe të ardhurat që rrjedhin nga këto fonde dhe t’i transferojnë në një llogari të veçantë.
Në vitin e dytë, dhe për të lejuar përfundimisht Ukrainën të përfitojë nga këto burime, Komisioni Europian do të paraqesë një propozim të ri në lidhje me angazhimin dhe përdorimin e tyre.
Komisioni Europian e justifikoi këtë qasje me nevojën për të treguar kujdes ekstrem përballë komplikimeve të mundshme ligjore. Komisioni Europian po vepron për këtë çështje në koordinim me vendet e Grupit 7 për të minimizuar rreziqet e komplikimeve të tilla.
Belgjika, ku ndodhet selia e Euroclear, tashmë takson të ardhurat dhe interesat e krijuara nga këto fonde, siç bën me institucionet e tjera financiare me bazë në tokën belge.
Kryeministri belg Alexandre de Croix premtoi në tetor se do t’i japë Ukrainës 1.7 miliardë euro në vitin 2024, që korrespondon me produktin e këtyre taksave të vendosura nga Belgjika.
Shuma përkatëse për vitin 2023 arriti në 600 milionë euro.
S.S/ReportTv.al