TIRANË- Ish-deputeti i Partisë Demokratike, një nga zërat kritikë të Lulzim Bashës, Astrit Patozi ka komentuar me ironi deklaratën e kryedemokratit i cili justifikoi humbjen pjesëmarrjen e ulët në zgjedhje. Absurde e quan edhe deklaratën e Bashës se si nuk ka humbur asnjë garë, pasi 6 zgjedhjet e kaluara që nuk ka fituar, kryedemokrati i ka cilësuar si gara jo të drejta, madje i etiketoi si "masakra zgjedhore".
"Domethënë këta që nuk kanë shkuar të votojnë dje qenkan të gjithë me PD-në zyrtare. Që i bie fitore publicitare me mbi 70 përqind. Ashtu duhet të jetë, në fakt, se ndryshe nuk do të dilte para të gjithëve Lulzim Basha që të përshëndeste zgjedhësit e vet për suksesin.
Me sa duket e ka harruar që e ka përdorur një herë këtë metodë 3 vjet të shkuara, kur i bojkotoi fare zgjedhjet. Madje atëherë ishin bashkë me udhëheqësin e foltores dhe e këndonin në një duet perfekt këtë serenatën e fitores, duke i numuruar si të vetët të gjithë abstenuesit. Nuk ka zgjedhur keq, se ata do të jenë gjithmonë shumicë, sa herë të ketë zgjedhje në Shqipëri, besoj edhe për nja 50 vjet të tjera. Kështu që në gjithë këtë gurgule i takon të ketë humbur vetëm doktorin. Atë duhet ta llogarisë që nuk e ka më kurrë, jo vetëm për këngë, por as për të vajtuar në rast, larg qoftë, të ndonjë disfate. E cila nuk mund të përjashtohet se mund të vijë një ditë, edhe pse deri tani nuk ka pasur fare shanse të ndodhë", shkruan Patozi.
PD-ja e Lulzim Bashës ka dalë forcë e tretë në 5 Bashki, (përveç Rrogozhinës në vend të dytë), duke u mundur jo vetëm nga PS-ja, por edhe nga ish-lideri i demokratëve, Sali Berisha.
B.K./ReportTv.al
