Banka Botërore ka miratuar 12 miliardë dollarë për t’iu ardhur në ndihmë shteteve në zhvillim që të blejnë dhe të shpërndajnë vaksinën për Covid-19, teste dhe trajtime tjera, për të arritur vaksinimin e të paktën 1 miliard njerëzve.
Shuma prej 12 miliardë dollarëve është pjesë e një pakete më të madhe të Grupit të Bankës Botërore prej rreth 160 miliardë dollarëve, për ti ndihmuar shtetet në zhvillim që të luftojnë pandeminë, duke theksuar se në programet e saj urgjente për këtë pandemi janë të përfshirë të paktën 111 shtete.
“Ne jemi duke zgjeruar dhe zmadhuar qasjen e përgjigjes së shpejtë ndaj emergjencës së COVID-19, në mënyrë që shtetet në zhvillim të kenë qasje të drejtë dhe të barabartë në vaksina”, ka thënë presidenti i kësaj Banke, David Malpass.
Përfaqësuesit e Bankës Botërore theksojnë se sigurimi i vaksinimit për të gjithë qytetarët mund të ndryshojë totalisht kursin e pandemisë.
Zhvillimi i vaksinës konsiderohet kyç për vënien nën kontroll të përhapjes së pandemisë e cila deri tani ka shkaktuar vdekjen e më shumë se 1 milion personave dhe ka infektuar të paktën 38 milionë.
