Deputeti Balla u shpreh se kjo rrugë e kthen Cerrikun në kryeqendrën e Shqipërisë. "Kjo është një rrugë që i jep Cerrikut një rol shumë të rëndësishëm në ndërlidhjen e të gjithë pjesëve të Shqipërisë, e lidh me Beratin, Korçën për shkak të rrugës së re të Gramshit, sigurisht dhe me Elbasanin. Në këtë mënyrë Cerriku po bëhet kryeqenda e Shqipërisë bashkë me Belshin. Dhe është dalja më e shkurtër me 40 km e Beratit me Tiranën. Pra, Berati e ka lidhjen me Tiranën 40 km më të shkurtër përmes këtij segmenti”, - tha Balla.
"Ky është një nga tre lotet e rrugës nacionale Cerrik-Ura Vajgurore. Është një rrugë me të gjitha standardet duke parashikuar trotuare dhe ndriçim në zonat e banuara. Kjo rrugë do t'u shërbejë banorëve të asaj zone dhe bizneseve të tyre”, -theksoi Duzha. Kryetari i grupit socialist diskutoi me përfaqësuesit e firmës zbatuese edhe për punësimin e banorëve të zonës si një domosdoshmëri në zbatimin e çdo projekti.
"Eleminoni asistencat sepse i latë njerëzit të rrinë tek dyert e bashkive. Njerëzit presin atë 5 mijë leksh dhe nuk duan punë dhe ky është problemi që ne nuk gjejmë punëtorë. Edhe pse kemi pagat jo më pak se 45 mijë lekë në muaj, përsëri nuk e duan atë pagë, preferojnë 5 mijë lekshin e ndihmës ekonomike. Është bërë shumë shumë problem për punëtorë, 200 punonjës dua unë sot dhe nuk vijnë”- u shpreh Agron Hysa.
Rruga është parashikuar të plotësojë të gjitha standardet në të gjithë gjatësinë e saj prej 16 km. Në zonat e banuara do të ketë trotuarë dhe ndriçim, ndërkohë që për zgjerimin e saj është gjetur konsensus i plotë nga banorët e zonës.
dy.b/shqiptarja.com