Shpresat për gjetjen e të mbijetuarve nga ngjarja e rëndë në Nepal janë shuar. Autoritetet vendase kanë konfirmuar deri më tani 68 viktima nga rrëzimi i avionit me 72 persona në bord, i cili më pas shpërtheu në flakë.
"Nuk ka gjasa të ketë ndonjë të mbijetuar," tha zëdhënësi Tek Prasad Rai për BBC.
Një prej pasagjerëve ka filmuar momentin e fundit teksa avioni po rrëzohej dhe u përpi nga flakët. Ky është momenti ku shfaqen për herë të fundit edhe disa prej pasagjerëve. Ende mbetet e paqartë se çfarë e shkaktoi rrëzimin e avionit, i cili më pas u përplas në tokë në grykën e lumit Seti, pak më shumë se një kilometër nga aeroporti.
Në bordin e avionit kishte 72 pasagjerë dhe anëtarë të ekuipazhit. Kryeministri i Nepalit e ka shpallur të hënën ditë zie kombëtare dhe qeveria ka ngritur një grup hetimor për të përcaktuar shkakun e rrëzimit të avionit. Nga pasagjerët, 53 thuhet se ishin nepalezë. Në aeroplan ishin pesë indianë, katër rusë dhe dy koreanë. Kishte gjithashtu një pasagjer nga Irlanda, Australia, Argjentina dhe Franca.
SI.E.//ReportTv.al