Një 60-vjeçar ka rënë në prangat e Policisë ditën e sotme në Lezhë, pasi iu gjet në banesë një sasi e madhe municionesh dhe një sasi kanabisi.
Mësohet se në pranga ka rënë Shefki Brunda, banues në lagjen "Nënë Tereza" të cilit iu gjetën në banesë 6 kilogramë e 300 gramë kanabis, 930 fishekë, 6 kallëpe lëndë eksplozive C-4, 7 granata difensive, 22 ndezës për granata, 99 kapsolla detonatore, pajisje metalkërkuese, kundërgaz ushtarak, 3 krehra dhe 3 aparate celulare. Po ashtu në banesën tjetër të tij në Lurë Policia gjeti një pushkë gjysmëautomatike.
Dyshohet se 60-vjeçari merrej me trafik armësh, ndërsa policia vijon hetimet për zbardhjen e plotë të këtij rasti.
Materialet procedurale do t’i kalojnë Prokurorisë pranë Gjykatës së Shkallës së Parë Lezhë, për veprime të mëtejshme, për veprat penale "Mbajtja pa leje e armëve të zjarrit, armëve shpërthyese dhe municionit luftarak" dhe "Prodhimi dhe shitja e narkotikëve”.
//ReportTv.al