HOLANDË - Trajneri i Feyenoord, Arne Slot ka konfirmuar se dëshiron të ulet në stolin e Liverpool në vendin e Jurgen Klopp. Problem mbetet kontrata e tij, pasi marrëveshja me holandezët skadon në verën e 2026. Të kuqtë kanë interes për të pasi gjermani Klopp do largohet në fundin e sezonit.
Liverpool filloi bisedimet me Feyenoord të mërkurën për emërimin e mundshëm të Slot në stol. Holandezi konfirmoi interesimin e tij për këtë punë në një intervistë për ESPN, përpara fitores 3-1 të Feyenoord të enjten kundër Go Ahead Eagles.
“Do jem i qartë se do të doja të punoja te Liverpool. Gjithçka që mund të them për këtë është se klubet janë në negociata. Unë jam në dhomën e pritjes”, tha Slot.
Ai shtoi se ishte "i sigurt" se Liverpool dhe Feyenoord do të ishin në gjendje të arrinin një marrëveshje.
45 vjeçari Slot udhëhoqi Feyenoord drejt titullit të Eredivisie 2022-23 dhe Kupës së Holandës këtë sezon, teksa më parë ka qenë i lidhur për një kalim te Tottenham Hotspur dhe Leeds United.
Liverpool do duhet të negociojë një tarifë dëmshpërblimi me Feyenoord nëse Slot emërohet në klubin e Premier League, pasi ai nuk ka një klauzolë lirimi për këtë verë.
S.DH/ReportTv.al