TIRANË- Nga muaji korrik kur rinisi transporti publik, studentët kanë lëvizur duke blerë biletë. Abonentë nuk u shpërndanë që me nisjen e pandemisë, por në një kohë që qytetarëve iu afruan pas fillimi të transportit, për studentët kjo akoma nuk ka ndodhur edhe pse ata u kthyen në auditore që në muajin gusht.
Për këtë arsye, një peticion me 669 firma studentësh u dorëzua këtë të hënë në këshillin bashkiak të Tiranës me kërkesë për nxjerrjen në treg të abonesë së studentit.
“Së pari i jemi drejtuar me një ankesë këshillit bashkiak të Tiranës për shkak se këto 4 muaj nga data 6 korrik kur ka rifilluar edhe transporti publik aboneja e studentit nuk ka dalë në qarkullim dhe së dyti një kërkesë nga këta studentë që aboneja të fillojë nga nëntori e mbrapa. Kjo është një kërkesë ekonomike e studentëve e cila është shumë e nevojshme, lidhet me përditshmërinë e tyre”-u shpreh Rigels Xhemollari.
Por burime nga Bashkia Tiranës thanë për Report tv se aboneja e studentit do të dalë në treg ditën e premte. Sipas shoqatës së transportit për këtë vit është bërë porosia për rreth 21 mijë abone studenti që kushton 600 lekë.
Rigels Xhemollari nga Qëndresa Qytetare shpjegon se pagesa për biletën e transportit është një barrë ekonomike që ju shtohet studentëve në situatën e pandemisë.
“Në këtë situatë pandemisë që tarifat nuk ndryshuan, ku studentëve ju duhet të paguajnë qiratë, i shtohet edhe barra e biletave ditore të transportit publik ashtu si i shtohet edhe barra e maskës, që tashmë me rregulloren e re të universitetit do të jetë e detyrueshme dhe do të jetë një përdorimshe”-tha Rigels Xhemollari.
Viti i ri akademik do të nisë më datë 2 nëntor me rreth 21 mijë studentë që regjistrohen për herë të parë.
B.K.//ReportTv.al