Autoritetet në Spanjë as nuk e kanë pohuar dhe as mohuar qëndrimin e tyre në lidhje me propozimin e Francës për të lidhur proçesin e liberalizimit të vizave të Kosovës me funksionalizimin e Sistemit Evropian të Udhëtimit dhe Informacionit (ETIAS).
Ministria e Punëve të Jashtme të Spanjës tha se qëndrimi i shteteve të ndryshme anëtare të Bashkimit Evropian lidhur me heqjen e vizave për qytetarët e Kosovës do të specifikohet në takimin e radhës të grupit punues të Këshillit të Bashkimit Evropian që do të mbahet vonë në nëntor ose në fillim të dhjetorit të këtij viti, raporton SchengenVisaInfo.com.
“Tema sapo ka filluar të trajtohet në Bruksel dhe do të ndjekë procedurën e saj normale gjatë së cilës do të specifikohen qëndrimet e shteteve të ndryshme anëtare”, tha Elena Aljarilla, nga departamenti i shtypit i Ministrisë së Jashtme të Spanjës.
Proçesi i liberalizimit të vizave për Kosovën është përfshirë për herë të parë në agjendën e takimit të Grupit Punues të Komisionit Evropian të mbajtur më 13 tetor të këtij viti si temë diskutimi. Gjatë takimit u raportua se autoritetet franceze shpalosën propozimin që ky proçes të lidhet me funksionalizimin e ETIAS dhe se të paktën katër anëtarë të BE-së e mbështetën një ide të tillë: Belgjika, Suedia, Hollanda dhe Spanja. Spanja nuk ka konfirmuar asgjë deri më tani, por departamenti i shtypit i Ministrisë së Jashtme spanjolle theksoi se qëndrimi i vendeve të BE-së do të sqarohet në mbledhjen e ardhshme të Grupit të Punës. Proçesi i liberalizimit të vizave për Kosovën filloi më 19 shkurt 2012.
Së fundmi, presidenti i Serbisë, Aleksandër Vuçiç, deklaroi se Serbia mbështet heqjen e vizave për Kosovën. Komentet e Vuçiqit erdhën pas komenteve të Presidentes së Komisionit Evropian, Ursula von Der Leyen, gjatë takimit të mbajtur me presidenten e Kosovës, Vjosa Osmani, në të cilën presidentja e KE-së theksoi se Kosova e meriton liberalizimin e vizave, duke shtuar se BE-ja do të përpiqet të bindë të gjithë. Shtetet anëtare që regjimi i vizave për qytetarët e Kosovës duhet të hiqet.
K.T./ReportTv.al“Kosova e meriton liberalizimin e vizave. Tani e kemi rikonfirmuar se i keni plotësuar të gjitha kriteret. Detyra jonë tani është të bindim të gjithë Këshillin Evropian, shumica prej tyre tashmë janë në anën tuaj”, tha Von der Leyen.
