I ftuar në emisionin “Rreze Dielli” në Report Tv, Pastori Ylli Doci tregoi më tepër për simbolet e Festës së Pashkëve dhe mesazhet që përcillen përmes saj. Duke u ndalur edhe tek një ritual shumë i këndshëm, siç është përgatitja e ‘biskotave të pashkëve’.
“Të shtunën në darkë bëjmë këto biskotat. Dhe është shumë e veçantë sepse në çdo pjesë të gatimit dhe përgatitjes kujtohet një gjë për ngjarjen e Jezusit duke u kryqëzuar dhe duke u ringjallur. Në recetë thotë me lugë druri dhe bajame, sepse ato rrihen në një qese plastike që mbyllet dhe copëtohen këto. Dhe kur e bëjmë këtë kujtohemi që Jezui u rrah me kamxhik. Përshembull hidhet pak uthull sepse kur Jezusi ishte në kryq i dhanë uthull të pijë dhe ai nuk e mori, kripa për lotët. Dhe në proçesin e bërjes, kjo është bukuria e kësaj, ndaj kur ta bëni duhet të keni parasysh momentin ku do ndaleni për të shpjeguar jo vetëm përzierjen por edhe domethënien që ka, pasi e mbyllim furrën dhe i fusim biskotat, furra nuk hapet më sepse e ke ngrohur paraprakisht dhe e heq nga priza dhe i vendosim një ngjitse që nënkupton se kështu u mbyll edhe varri i Jezusit nga romakët. Në mëngjes pastaj siç shkruan gratë tek varri e panë gurin e varrit të hapur dhe ne shkojmë e hapim furrën dhe shikojmë biskotat. Dhe po ti hapësh biskotat janë bosh brenda. kjo është edhe simbolika e varrit bosh” tha pastori Ylli Doci.
Kjo është receta e ‘Biskota të Pashkëve’ që do t’ju duhen për të krijuar këtë ritual kaq të këndshëm:
Përbërësit:
1 filxhan bajame
1 lugë uthull
3 të bardha veze
1 majë luge kripë
1 filxhan sheqer
1 qese plastike që mbyllet
lugë druri
tas për përzierjen
mikser
tavë për biskotat
lugë
shirit
Përgatitja
Ndizeni furrën dhe ndani mënjanë disa letra pjekjeje.
Në tasin e mikserit të kuzhinës vendosni sëbashku të gjithë përbërësit dhe më pas përzijeni me mikserin.
Përziejini deri sa masa të jetë e njëjtrajtshme dhe pa kokrriza. Vazhdoni me përzierjen deri sa brumi të formohet plotësisht dhe shkuma e vezëve të fryhet dhe më pas ndaje brumin në toptha të vegjël. Secilën prej tyre vendoseni mbi letrën e pjekjes dhe piqini në furrë për rreth 20 minuta.
MC/ReportTv.al